ye kyaa ke sab se bayaan dil kii haalaten karanii - Ahmed Faraz
ye kyaa ke sab se bayaan dil kii haalaten karanii
'faraz' tujh ko na aaiin muhabbaten karanii
ye qurb kyaa hai ke tuu saamane hai aur hamen
shumaar abhii se judaaii kii sa'aten karanii
koii khudaa ho ke patthar jise bhii ham chaahen
tamaam umr usii kii ibaadaten karanii
sab apane apanee qariine se muntazir us ke
kisii ko shukr kisii ko shikaayaten karanii
ham apane dil se hain majabuur aur logon ko
zaraa sii baat pe barpaa qayaamaten karanii
milen jab un se to mubaham sii guftaguu karanaa
phir apane aap se sau-sau vazaahaten karanii
ye log kaise magar dushmanii nibhaaten hain
hamiin ko raas na aaiin muhabbaten karanii
kabhii 'faraz' naye mausamon men ro denaa
kabhii talaash puraanii raqaabaten karanii
0 comments:
Post a Comment