ye kis Khalish ne phir is dil men aashiyaanaa kiyaa - faiz ahmed faiz

ye kis Khalish ne phir is dil men aashiyaanaa kiyaa

phir aaj kis ne suKhan ham se gaayebaanaa kiyaa

gam-e-jahaan ho, ruKh-e-yaar ho ke dast-e-uduu

salook jis se kiyaa hamane aashiqaanaa kiyaa

the Khaak-e-raah bhii ham log qahar-e-tuufaan bhii

sahaa to kyaa na sahaa aur kiyaa to kyaa na kiyaa

Khushaa ke aaj har ik muddaii ke lab par hai

vo raaz jis ne hamen raand-e-zamaanaa kiyaa

vo hiilaagar jo vafaajuu bhii hai jafaaKhuu bhii

kiyaa bhii "Faiz" to kis but se dostaanaa kiyaa