ye kaun duub gayaa aur ubhar gayaa mujh men - Razi Akhtar Shauq
ye kaun duub gayaa aur ubhar gayaa mujh men
ye kaun saaye kii suurat guzar gayaa mujh men
ye kis ke sog men shoridaa-haal phirataa huun
vo kaun shakhs thaa aisaa ki mar gayaa mujh men
ajab havaa-e-bahaaraan ne chaaraasaazii kii
vo zakhm jis ko na bharanaa thaa bhar gayaa mujh men
vo aadamii ki jo patthar thaa jii rahaa hai abhii
jo aaiinaa thaa vo bikhar gayaa mujh men
bisaal kyaa ki vo jab bhii qariib se guzaraa
vo yuun lagaa ki koii raqs kar gayaa mujh men
vo saath thaa to ajab dhuup chaanv rahatii thii
bas ab to ek hii mausam thahar gayaa mujh men
0 comments:
Post a Comment