ye daulat bhii le lo, ye shoharat bhii le lo - Sudarshan Faakir

ye daulat bhii le lo, ye shoharat bhii le lo

bhale chhiin lo mujhase merii javaanii

magar mujhako lauTaa do bachapan kaa saavan

vo kaagaz kii kashtii, vo baarish kaa paanii

muhalle kii sabase nishaanii puraanii

vo budhiyaa jise bachche kahate the naanii

vo naanii kii baaton men pariyon kaa deraa

vo chahare kii jhuriryon men sadiyon kaa pheraa

bhulaaye nahiin bhuul sakataa hai koI

vo chhoTii sii raaten vo lambii kahaanii

kadii dhuup men apane ghar se nikalanaa

vo chidiyaa vo bul-bul vo titalii pakadanaa

vo gudiyaa kii shaadii men ladanaa jhagadanaa

vo jhuulon se giranaa vo gir ke sambhalanaa

vo piital ke chhallon ke pyaare se tohafe

vo TuuTii huii chuudiyon kii nishaanii

kabhii ret ke uunche Tiilon pe jaanaa

gharonde banaanaa banaake miTaanaa

vo maasuum chaahat kii tasviir apanii

vo Khvaabon khilaunon kii jaagiir apanii

na duniyaa kaa gam thaa na rishton ke bandhan

badii khuubasuurat thii vo zindagaanii