yaad hain saare vo aish-e-baafaraagat ke maze - Hasrat Mohani
yaad hain saare vo aish-e-baafaraagat ke maze
dil abhii bhulaa nahiin aagaaz-e-ulfat ke maze
vo saraapaa naaz thaa begaanaa-e-rasm-e-jafaa
aur mujhe haasil the lutf-e-benihaayat ke maze
husn se apane vo gaafil thaa main apane ishq se
ab kahaan se laauun vo naa-vaaqfiyat ke maze
merii jaanib se nigaah-e-shauq kii betaabiyaan
yaar kii jaanib se aagaaz-e-sharaart ke maze
yaad hain vo husn-o-ulfat kii niraalii shokhiyaan
iltamaas-e-uzr-o-tamahiid-e-shikaayat ke maze
sehaten laakhon merii biimaarii-e-gam par nisaar
jis men uthe baarahaa un kii ayaadat ke maze
0 comments:
Post a Comment