vo firaaq aur wo visaal kahaan - Mirza Ghalib
vo firaaq aur wo visaal kahaan
vo shab-o-roz-o-maah-o-saal kahaan
fursat-e-kaarobaar-e-shauq kise
zauq-e-nazzaaraa-e-jamaal kahaan
dil to dil vo dimaag bhii na rahaa
shor-e-saudaa-e-khat-o-khaal kahaan
thii wo ik shakhs ke tasavvur se
ab vo raannaaii-e-khayaal kahaan
aisaa aasaan nahiin lahuu ronaa
dil men taaqat jigar men haal kahaan
hamase chuutaa qimaarkhaanaa-e-ishq
vaan jo jaayen girah men maal kahaan
fikr-e-duniyaa men sar khapaataa huun
main kahaan aur ye vabaal kahaan
muzamahil ho gaye quvaa 'ghalib'
wo anaasir men aitadaal kahaan
0 comments:
Post a Comment