vo dil nasiib huaa jis ko daag bhii na milaa - Jalal Lucknawi
vo dil nasiib huaa jis ko daag bhii na milaa
milaa to gam-kadaa jis men chiraag bhii na milaa
gaii thii kahake main laatii huun zulf-e-yaar kii buu
phirii to baad-e-sabaa kaa dimaag bhii na milaa
asiir karake hamen kyon rihaa kiyaa saiyaad
vo ham-safiir bhii chhuute vo baag bhii na milaa
bhar aaye mahafil-e-saaqii men kyon na aankh apanii
vo be-nasiib hain khaalii ayaag bhii na milaa
chiraag leke iraadaa thaa bakht dhuundhate
shab-e-firaaq thii koii chiraag bhii na milaa
khabar ko yaar kii bhejaa thaa gum huaa aisaa
havaas-e-raftaa kaa ab tak suraag bhii na milaa
"Jalal" baag-e-jahaan men vo andaliib hain ham
chaman ko phuul mile ham ko daag bhii na milaa
0 comments:
Post a Comment