vo aake khvaab men taskiin-e-iztiraab to de - Mirza Ghalib
vo aake khvaab men taskiin-e-iztiraab to de
vale mujhe tapish-e-dil majaal-e-khwaab to de
kare hai qatl lagaavat men teraa ro denaa
terii tarah koii teg-e-nigaah ko aab to de
dikhaake jumbish-e-lab hii tamaam kar hamako
na de jo bosaa to muunh se kahiin javaab to de
pilaa de oak se saaqii jo hamase nafrat hai
pyaalaa gar nahiin detaa na de, sharaab to de
'asad' khushii se mere haath paanv phuul gae
kahaa jo us ne zaraa mere paanv daab to de
0 comments:
Post a Comment