vahii phir mujhe yaad aane lage hain - Khumar Barabankvi

vahii phir mujhe yaad aane lage hain

jinhen bhulaane men zamaane lage hain

vo hain paas aur yaad aane lage hain

muhabbat ke hosh ab thikaane lage hain

sunaa hai hamen vo bhulaane lage hain

to kyaa ham unhen yaad aane lage hain

hataaye the jo raaste se doston kii

vo patthar mere ghar men aane lage hain

ye kahanaa thaa un se muhabbat hai mujhako

ye kahane men mujh ko zamaane lage hain

qayaamat yaqiinan qariib aa rahii hai

'khumar' ab to masjid men jaane lage hain