utariin ajiib roshaniyaan raat Khvaab men - Shakeb Jalali

utariin ajiib roshaniyaan raat Khvaab men

kyaa kyaa na aks tair rahe the saraab men

kab se hain ek harf pe nazaren jamiin huiin

vo padh rahaa huun jo nahiin likkhaa kitaab men

phir tiragii ke Khvaab se chaunkaa hai raastaa

phir raushanii-sii daud gaii hai sahaab men

paanii nahiin ki apane hii chehare ko dekh luun

manzar zamiin ke dhuundhataa huun maahataab men

kab tak rahegaa ruuh pe pairaahan-e-badan

kab tak havaa asiir rahegii hubaab men

jiine ke saath maut kaa dar hai lagaa huaa

Khushkii dikhaaii dii hai samandar ko Khvaab men

ek yaad hai ki chhiin rahii hai labon se jaam

ek aks hai ki kaanp rahaa hai sharaab men