us kii hasarat hai jise dil se mitaa bhii na sakuun - Ameer Minai

us kii hasarat hai jise dil se mitaa bhii na sakuun

dhuundhane us ko chalaa huun jise paa bhii na sakuun

daal kar khaak mere khuun pe qaatil ne kahaa

kuchh yeh mehandii nahiin merii ke mitaa bhii na sakuun

zabt kambakht ne aur aa ke galaa ghontaa hai

ke use haal sunaauun to sunaa bhii na sakuun

us ke pahaluu men jo lejaa ke sulaa duun dil ko

niind aisii use aaye ke jagaa bhii na sakuun

naqsh-e-paa dekh to luun laakh karuungaa sajade

sar meraa arsh nahiin hai ki jhukaa bhii na sakuun

bevafaa likhate hain vo apanii kalam se mujh ko

ye vo qismat kaa likhaa hai jo mitaa bhii na sakuun

is tarah soye hain sar rakh ke mere zaanon par

apanii soii huii qismat ko jagaa bhii na sakuun