uljhaav kaa mazaa bhii terii baat hii men thaa - Aziz Qaisi

uljhaav kaa mazaa bhii terii baat hii men thaa

teraa javaab tere savaalaat hii men thaa

saayaa kisii yaqiin kaa bhii jis par na pad sakaa

vo ghar bhii shahar-e-dil ke muzaafaat hii men thaa

ilzaam kyaa hai ye bhii na jaanaa tamaam umr

mulzim tamaam umr havaalaat hii men thaa

ab to faqat badan kii muravvat hai daramiyaan

thaa rabt jaan-o-dil kaa to shuruuaat hii men thaa

mujh ko to qatl kar ke manaataa rahaa hai jashn

vo ziilihaaz shakhs merii zaat hii men thaa