tu kahiin bhii rahe sar pe tere ilzaam to hai - Sabir Jalalabadi

tu kahiin bhii rahe sar pe tere ilzaam to hai

tere haathon kii lakiiron men meraa naam to hai

mujhako tuu apanaa banaa yaa na banaa terii Khushii

tuu zamaane men mere naam se badanaam to hai

mere hisse men koii jaam na aayaa na sahii

terii mahafil men mere naam koii shaam to hai

dekh kar log mujhe naam teraa lete hain

is pe main Khush huun muhabbat kaa ye anjaam to hai

vo sitamagar hii sahii dekh ke usako "Sabir"

shukr is dil-e-bimaar ko aaraam to hai