terii khushbuu kaa pataa karatii hai - Parveen Shakir

terii khushbuu kaa pataa karatii hai

mujh pe ehasaan havaa karatii hai

shab kii tanhaaii men ab to aksar

guftaguu tujh se rahaa karatii hai

dil ko us raah pe chalanaa hii nahiin

jo mujhe tujh se judaa karatii hai

zindagii merii thii lekin ab to

tere kahane men rahaa karatii hai

us ne dekhaa hii nahiin varnaa ye aankh

dil kaa ehavaal kahaa karatii hai

beniyaaz-e-kaaf-e-dariyaa angusht

ret par naam likhaa karatii hai

shaam padate hii kisii shakhs kii yaad

kuuchaa-e-jaan men sadaa karatii hai

mujh se bhii us kaa hai vaisaa hii suluuk

haal jo teraa ana??? karatii hai

dukh huaa karataa hai kuchh aur bayaan

baat kuchh aur huaa karatii hai

abr barase to inaayat us kii

shaakh to sirf duaa karatii hai

masalaa jab bhii uthaa chiraagon kaa

faisalaa sirf havaa karatii hai