tere bagair ye ab zindagii kahaan guzare - Hafeez Aatish

tere bagair ye ab zindagii kahaan guzare

qadam qadam pe tere saath kaa gumaan guzare

ye din jo dhiire se phisalaa to shaam ke manzar

tere bagair udaasii ke daramiyaan guzare

vo ashk huun ki sar-e-raah gir gayaa thaa kabhii

uthaa sakaa na koii kitane kaaravaan guzare

main khushk hoke bikharataa rahaa huun pairon men

bahut zamaanaa huaa mujh pe kashtiyaan guzare

tere badan kaa aalaao ho merii saanson men

kabhii vo lamhaa bhii ik baar jaan-e-jaan guzare

ye baat ab bhii nahiin hai kisii se kahane kii

tamaam sajde tere dar se raayagaan guzare