sitam havaa kaa agar tere tan ko raas nahiin - Wazeer Agha

sitam havaa kaa agar tere tan ko raas nahiin

kahaan se laauun vo jhonkaa jo mere paas nahiin

pighal chukaa huun tamaazat men aafataab kii main

meraa vujuud bhii ab mere aas-paas nahiin

mere nasiib men kab thii barahanagii apanii

milii vo mujh ko tamannaa ki be-libaas nahiin

kidhar se utare kahaan aa ke tujh se mil jaaye

abhii nadii ke chalan se tuu ruushanaas nahiin

khulaa padaa hai samandar kitaab kii suurat

vahii padhe ise aakar jo naashanaas nahiin

lahuu ke saath gaii tan-badan kii sab chahakaar

chubhan sabaa men nahiin hai kalii men baas nahiin