shabaab aayaa kisii but par fidaa hone kaa vaqt aayaa - Harichand Akhtar

shabaab aayaa kisii but par fidaa hone kaa vaqt aayaa

merii duniyaa men bande ke khudaa hone kaa vaqt aayaa

unhen dekhaa to zaahid ne kahaa iimaan kii ye hai

ki ab insaan ko sajadaa-ravaa hone kaa vaqt aayaa

takallum kii khaamoshii kah rahii hai harf-e-matalab se

ki ashk-aamez nazaron se adaa hone kaa vaqt aayaa

khudaa jaane ye hai auj-e-yaqiin yaa pastii-e-himmat

khudaa se kah rahaa huun naakhudaa hone kaa vaqt aayaa

hamen bhii aa padaa hai doston se kaam kuchh yaanii

hamaare doston ke bevafaa hone kaa vaqt aayaa