shaayad aagaaz huaa phir kisii afasaane kaa - Shakeel Badayuni

shaayad aagaaz huaa phir kisii afasaane kaa

hukm aadam ko hai jannat se nikal jaane kaa

un se kuchh kah to rahaa huun magar allaah na kare

vo bhii mafahuum na samajhe mere afasaane kaa

dekhanaa dekhanaa ye hazarat-e-vaaiz hii na hon

raastaa puuchh rahaa hai koii maikhaane kaa

beta'alluq tere aage se guzar jaataa huun

ye bhii ek husn-e-talab hai tere diivaane kaa

hashr tak garmii-e-hangaamaa-e-hastii hai "shakeel"

sil-silaa khatm na hogaa mere afasaane kaa