rah-e-shauq se ab hataa chaahataa huun - Majaz

rah-e-shauq se ab hataa chaahataa huun

koshish husn kii dekhanaa chaahataa huun

koii dil-saa dard aashanaa chaahataa huun

rah-e-ishq men rahnumaa chaahataa huun

tujhii se tujhe chhiinanaa chaahataa huun

ye kyaa chaahataa huun ye kyaa chaahataa huun

khataaon pe jo mujh ko maail kare phir

sazaa aur aisii sazaa chaahataa huun

vo makhmuur nazaren vo madhosh aankhen

kharaab-e-muhabbat huaa chaahataa huun

vo aankhen jhukiin vo koii muskuraayaa

payaam-e-muhabbat sunaa chaahataa huun

tujhe dhuundhataa huun terii justajuu hai

mazaa hai khud gum huaa chaahataa huun

kahaan kaa karam aur kaisii inaayat

'majaz' ab jafaa hii jafaa chaahataa huun