pahaluu-e-shaah men ye duKhtar-e-jamahuur kii qabar - Sahir Ludhianvi

pahaluu-e-shaah men ye duKhtar-e-jamahuur kii qabar

kitane gumgushtaa fasaanon kaa pataa detii hai

kitane Khuurez haqaayaq se uthaatii hai naqaab

kitanii kuchalii hui jaanon kaa pataa detii hai

kaise magruur shahanshaahon kii taskiin ke liye

saalhaasaal hasiinaaon ke baazaar lage

kaise bahakii huii nazaron kii taaish ke liye

surKh mahalon men javaan jismon ke anbaar lage

sahamii sahamii sii fizaaon men ye viraan marqad

itanaa Khaamosh hai fariyaadkunaa ho jaise

sard shaaKhon men havaa chiiKh rahii hai aise

ruuh-e-taqadiis-o-vafaa marsiyaaKhvaan ho jaise

tuu merii jaan hairat-o-hasarat se na dekh

ham men koii bhii jahaan nuur-o-jahaangiir nahiin

tuu mujhe chhod ke thukaraa ke bhii jaa sakatii hai

tere haathon men meraa saat hai zanjiir nahiin