nahiin ki milane milaane kaa silsilaa rakhanaa - Zafar Iqbal

nahiin ki milane milaane kaa silsilaa rakhanaa

kisii bhii satah pe koii to raabtaa rakhanaa

madad kii tum se tavaqqo to Khair kyaa hogii

gariib-e-shahar-e-sitam huun meraa pataa rakhanaa

marenge aur hamaare sivaa bhii tum pe bahut

ye jurm hai to phir is jurm kii sazaa rakhanaa

naye safar pe ravaanaa huaa hai az-sar-e-nau

jab aauungaa to meraa naam bhii nayaa rakhanaa

hisaar-e-shauq uthaanaa 'Zafar' zaruur magar

kisii taraf se nikalane kaa raastaa rakhanaa