mushkil hai ab shahar men nikale koii ghar se - Parveen Shakir

mushkil hai ab shahar men nikale koii ghar se

dastaar pe baat aa gaii hai hotii huii sar se

barasaa bhii to kis dasht ke be-faiz badan par

ik umr mere khet the jis abr ko tarase

is baar jo indhan ke liye kat ke giraa hai

chidiyon ko badaa pyaar thaa us buudhe shajar se

mehanat merii aandhii se to manasuub nahiin thii

rahanaa thaa koii rabt shajar kaa bhii samar se

khud apane se milane kaa to yaaraa na thaa mujh men

main bhiid men gum ho gaii tanhaaii ke dar se

benaam musaafat hii muqaddar hai to kyaa gam

manzil kaa ta'yyun kabhii hotaa hai safar se

pattharaayaa hai dil yuun ki koii ism padhaa jaaye

ye shahar nikalataa nahiin jaaduu ke asar se

nikale hain to raste men kahiin shaam bhii hogii

suuraj bhii magar aayegaa is raah-guzar se