mere sang-e-mazaar par Farahaad - Meer Taqi Meer
mere sang-e-mazaar par Farahaad
rakh ke teshaa kahe hai 'yaa ustaad'
ham se bin marg kyaa judaa ho malaal
jaan ke saath hai dil-e-naashaad
fikr-e-taamiir men na rah muniim
zindagii kii kuchh bhii hai buniyaad
khaak bhii sar pe daalane ko nahiin
kis kharaabe men ham huye aabaad
sunate ho tuk suno ki phir mujh baad
na sunoge ye naalaa-o-fariyaad
har taraf hain asiir ham-aavaaz
baag hai ghar teraa to ai sayyaad
ham ko maranaa ye hai ke kab hove
apanii qaid-e-hayaat se aazaad
0 comments:
Post a Comment