maanaa ke un ke nezon pe ab sar nahiin koii - Sagar Azmi

maanaa ke un ke nezon pe ab sar nahiin koii

kyaa un ke aastiin men bhii Khanjar nahiin koii

majabuuriyon ne ghar se nikalane na diyaa

duniyaa samajh rahii hai meraa ghar nahiin koii

ab kyaa karenge ham naye suurajkii roshanii

jab dekhane ke vaaste manzar nahiin koii

dil ho rahaa hai der se Khaamosh jhiil saa

kyaa doston ke haath men patthar nahiin koii

qismat sabhii kii vaqt ke haathon men rahatii hai

is daur men kisii kaa muqaddar nahiin koii