maal-e-soz-e-gam haae nihaanii dekhate jaao - Fani Badayuni
maal-e-soz-e-gam haae nihaanii dekhate jaao
bhadak uthii hai shammaa-e-zindagaanii dekhate jaao
chale bhii aao vo hai qabr-e-fani dekhate jaao
tum apane marane vaale kii nishaanii dekhate jaao
abhii kyaa hai kisii din khuun rulaayegaa ye khaamoshii
zubaan-e-haal ki jadd-o-bayaanii dekhate jaao
garuur-e-husn kaa sadaqaa koii jaataa hai duniyaa se
kisii kii khaak men milatii javaanii dekhate jaao
udhar muunh pher kar kyaa zibaah karate ho, idhar dekho
merii gardan pe khanjar kii ravanii dekhate jaao
bahaar-e-zindagii kaa lutf dekhaa hai aur dekhoge
kisii kaa aish marg-e-naagahaanii dekhate jaao
sune jaate na the tum se mere din raat ke shikave
kafan sarakaao merii be-zubaanii dekhate jaao
vo uthaa shor-e-maataam aakharii diidaar-e-mayyat par
ab uthaa chaahate hain naash-e-fani dekhate jaao
0 comments:
Post a Comment