laazim thaa ki dekho meraa rastaa koii din aur - Mirza Ghalib
laazim thaa ki dekho meraa rastaa koii din aur
tanhaa gaye kyon ab raho tanhaa koii din aur
mit jaayegaa sar, gar teraa paththar na ghisegaa
huun dar pe tere naasiyaafarsaa koii din aur
aaye ho kal aur aaj hii kahate ho ki jaauun
maanaa ki hameshaa nahiin achchaa koii din aur
jaate hue kahate ho qayaamat ko milenge
kyaa khuub! qayaamat kaa hai goyaa koii din aur
haan ae falak-e-piir, javaan thaa abhii aarif
kyaa teraa bigadataa jo na marataa koii din aur
tum maah-e-shab-e-charduhum the mere ghar ke
phir kyon na rahaa ghar kaa vo naqshaa koii din aur
tum kaun se aise the khare daad-o-sitad ke
karataa malakulmaut taqaazaa koii din aur
mujhase tumhen nafrat sahii, nayyar se ladaaii
bachhon kaa bhii dekhaa na tamaashaa koii din aur
guzarii na baharhaal yaa muddat khushii-naakhush
karanaa thaa javaanmarg! guzaaraa koii din aur
naadaan ho jo kahate ho ki kyon jiite ho 'ghalib'
qismat men hai marane kii tamannaa koii din aur
0 comments:
Post a Comment