laakhon kii sunaa tum ne taqadiir sanvaarii hai - Syed Shafaq Shah Chishti

laakhon kii sunaa tum ne taqadiir sanvaarii hai

mujh se yahii kah dete ab ke terii baarii hai

daalii hai nazar jab se ek nashaa saa taarii hai

kyaa koii parii saaqii shiishe men utaarii hai

kyaa us ko rijhaayenge jannat ke hasiin jalve

dahaliiz tere dar kii jis shaKhs ko pyaarii hai

virase men milii ham ko shaahii bhii faqiirii bhii

aur gam to "Shafaq" goyaa jaagiir hamaarii hai