koii naii zamiin ho nayaa aasamaan bhii ho - Firaq Gorakhpuri

koii naii zamiin ho nayaa aasamaan bhii ho

ai dil ab us ke paas chalen vo jahaan bhii ho

afsurdagii-e-ishq men soz-e-nihaan bhii ho

yaanii bujhe dilon se kuchh uthataa dhuaan bhii ho

is darjaa iKhtilaat aur itanii mugaayarat

tuu mere aur apane kabhii daramiyaan bhii ho

ham apane gamgusaar-e-muhabbat na ho sake

tum to hamaare haal pe kuchh meharbaan bhii ho

bazm-e-tasavurrat men ai dost yaad aa

is mahafil-e-nishaat men gam kaa samaan bhii ho

mahabuub vo ki sar se qadam tak Khuluus ho

aashiq vahii ki husn se kuchh badgumaan bhii ho