kheton kaa haraapan main kahaan dekh rahaa huun - Bal Swarup Rahi
kheton kaa haraapan main kahaan dekh rahaa huun
main rel ke injan kaa dhuaan dekh rahaa huun
fursat hai kahaan aap ke baagaat men tahaluun
main apane ujadane kaa samaan dekh rahaa huun
khanjar jo gavaahii hai mere qatl kii us par
apanii hii ungaliyon ke nishaan dekh rahaa huun
sab aap kii aankhon se jahaan dekh rahe hain
main aap kii aankhon men jahaan dekh rahaa huun
vo soch men duube hain nishaanaa ho kahaan par
main tuute huye tiir-kamaan dekh rahaa huun
maaluum hai taqariir likhaa laaye hain kis se
main un kaa zaraa tarz-e-bayaan dekh rahaa huun
jo main ne khariidaa thaa kabhii bech ke khud ko
niilaam men bikataa vo makaan dekh rahaa huun
tuu dhuundh rahii hogii kahaan mujh ko qayaamat
main kab se terii raah yahaan dekh rahaa huun
tokaa jo unhonne ki kaho dekh lii duniyaa
main bhii kahaa hans ke ki haan dekh rahaa huun
buudhii huii ummiid to kyaa phir bhii laduungaa
main apane iraade ko javaan dekh rahaa huun
jis raah se jaanaa hai naii piidhii ko 'Rahi'
us raah men ik andhaa kuaan dekh rahaa huun
0 comments:
Post a Comment