kahaan kii guunj dil-e-naatavaan men rahatii hai - Ahmed Mushtaq

kahaan kii guunj dil-e-naatavaan men rahatii hai

ki thartharii sii ajab jism-o-jaan men rahatii hai

mazaa to ye hai ki vo Khud to hai naye ghar men

aur us kii yaad puraane makaan men rahatii hai

agarche us se mere betakallufii hai bahut

jhijhak sii ek magar daramiyaan men rahatii hai

pataa to fasl-e-gul-o-laalaa kaa nahiin maaluum

sunaa hai qurb-o-vaar-e-Khizaan men rahatii hai

main kitanaa vaham karuun lekin ik shuaa-e-yaqiin

kahiin navaah-e-dil-e-bad-gumaan men rahatii hai

hazaar jaan khapaataa rahuun magar phir bhii

kamii sii kuchh mere tarz-e-bayaan men rahatii hai