kab talak pyaas ke saharaa men jhulasate jaayen - Umeed Fazli
kab talak pyaas ke saharaa men jhulasate jaayen
ab ye baadal jo uthe hain to barasate jaayen
kaun batalaaye tumhen kaise vo mausam hain ki jo
mujh se hii duur rahen mujh men hii basate jaayen
haaye kyaa log ye aabaad huye hain mujh men
pyaar ke lafz likhen lahaje se dasate jaayen
aaiinaa dekhuun to ik chehare ke be-rang nuquush
ek naadiiddaa-sii zanjiir men kasate jaayen
juz muhabbat kise aayaa hai mayassar ummiid
aisaa lamhaa ki jidhar sadiyon ke raste jaayen
0 comments:
Post a Comment