jagmagaate shahar kii raanaaiiyon men kyaa na thaa - Ameer Kazalbash

jagmagaate shahar kii raanaaiiyon men kyaa na thaa

dhuundhane nikalaa thaa jis ko main vahii cheharaa na thaa

ret pe likhe huye naamon ko padh kar dekh lo

aaj tanhaa rah gayaa huun kal magar aisaa na thaa

ham vahii tum bhii vahii mausam vahii manzar vahii

faasalaa bad jaayegaa itanaa kabhii sochaa na thaa

fikr ke dar pe koii aahaat koii dastak nahiin

vo faqat biimaar jis kaa koii hamsaayaa na thaa

chhod aayaa jin safiinon ko talaatum ke qariib

naakhudaa un men teraa shaayad koii apanaa na thaa