jab se tuune mujhe diivaanaa banaa rakhaa hai - Hakim Nasir
jab se tuune mujhe diivaanaa banaa rakhaa hai
sang har shakhs ne haathon men uthaa rakhaa hai
us ke dil par bhii kadii ishq men guzarii hogii
naam jis ne bhii muhabbat kaa sazaa rakhaa hai
pattharon aaj mere sar pe baraste kyuun ho
main ne tum ko bhii apanaa khudaa rakhaa hai
ab mere diid kii duniyaa bhii tamaashaaii hai
tuune kyaa mujhako muhabbat men banaa rakhaa hai
piijaa aiyaam kii talkhii ko bhii hansake "nasir"
gam ko sahane men bhii kudarat ne mazaa rakhaa hai
0 comments:
Post a Comment