jab kabhii un ke tavajjo men kamii paaii gaii - Sahir Ludhianvi

jab kabhii un ke tavajjo men kamii paaii gaii

az sar-e-nava-e-daastaan-e-shauq doharaaii gaii

bik chuke jab tere lab phir tujh ko kyaa shikavaa agar

zindagaanii baadaa-o-saagar se bahalaaii gaii

ai gam-e-duniyaa tujhe kyaa ilm tere vaaste

kin bahaanon se tabiyat raah par laaii gaii

ham karen tark-e-vafaa achchhaa chalo yuun hii sahii

aur agar tark-e-vafaa se bhii na rusvaaii gaii

kaise kaise chashm-o-aariz gard-e-gam se bujh gaye

kaise kaise paikaron kii shaan-e-zebaaii gaii

dil kii dhadakan men tavazzun aa chalaa hai Khair ho

merii nazaren bujh gaiin yaa terii raanaaii gaii

un kaa gam un kaa tasavvur un ke shikave ab kahaan

ab to ye baaten bhii ai dil ho gaiin aaii gaii