jab kabhii bolanaa vaqt par bolanaa - Tahir Faraz

jab kabhii bolanaa vaqt par bolanaa

muddaton bolanaa mukhtasar bolanaa

daal degaa halaaqat men ik din tujhe

ai parinde teraa shaakh par bolanaa

pahale kuchh duur tak saath chal ke parakh

phir mujhe hamsafar hamsafar bolanaa

umr bhar ko mujhe besadaa kar gayaa

teraa ik baar muunh pher kar bolanaa

merii khaanaabadoshii se puuchhe koii

kitanaa mushkil hai raste ko ghar bolanaa

kyuun hai khaamosh sone kii chidiyaa bataa

lag gaii tujh ko kis kii nazar bolanaa