jaan-e-afasaanaa yahii kuchh bhii ho afasaane kaa naam - Anand Narain Mullah
jaan-e-afasaanaa yahii kuchh bhii ho afasaane kaa naam
zindagii hai dil kii dhadakan tez ho jaane kaa naam
qataraa qataraa zindagii ke zahar kaa piinaa hai gam
aur khushii hai do ghadii pii kar bahak jaane kaa naam
intazaar-e-fasl-e-gul men kho chuke aankhon kaa nuur
aur bahaar-e-baag letii hii nahiin aane kaa naam
taab-e-naakaamii nahiin to aarazuu karataa hai kyaa
aarazuu hai mauj ke saahil se takaraane kaa naam
aaj tuu kal koii aur hogaa sadar-e-bazm-e-may
saaqiyaa tujh se nahiin ham se hai maikhaane kaa naam
vaaqif-e-"mullah" na thii bazm-e-khirad, ye tay huaa
ho na ho, ye hai kisii mashahuur diivaane kaa naam
0 comments:
Post a Comment