itanaa to zindagiii men kisii kii khalal pade - Kaifi Azmi
itanaa to zindagiii men kisii kii khalal pade
hansane se ho sukuun naa rone se kal pade
jis tarah hans rahaa huun main pii-pii ke ashk-e-gam
yuun duusaraa hanse to kalejaa nikal pade
ek tum ke tum ko fikr-e-nasheb-o-faraaz hai
ek ham ke chal pade to baharahaal chal pade
muddat ke baad us ne jo kii lutf kii nigaah
jii khush to ho gayaa magar aansuu nikal pade
saaqii sabhii ko hai gam-e-tashnaalabii magar
may hai usii ke naam pe jis ke ubal pade
0 comments:
Post a Comment