is kaa gilaa nahiin ki duaa be-asar gaii - Tilok Chand Mehroom

is kaa gilaa nahiin ki duaa be-asar gaii

ik aah kii thii vo bhii kahiin jaa ke mar gaii

ai ham-nafas na puuchh javaanii kaa maajaraa

mauj-e-nasiim thii, idhar aaii, udhar gaii

daam-e-gam-e-hayaat men ulajhaa gaii umiid

ham ye samajh rahe the ki ehasaan kar gaii

is zindagii se ham ko na duniyaa milii na diin

taqadiir kaa mushaahidaa karate guzar gaii

bas itanaa hosh thaa mujhe roz-e-vidaa-e-dost

viiraanaa thaa nazar men jahaan tak nazar gaii

har mauj aab-e-sindh huii vaqf-e-pech-o-taab

"mehroom" jab vatan men hamaarii khabar gaii