ik lafz-e-mohabbat kaa adanaa saa fasaanaa hai - Jigar Moradabadi

ik lafz-e-mohabbat kaa adanaa saa fasaanaa hai

simate to dil-e-aashiq phaile to zamaanaa hai

ye kis kaa tasavvur hai ye kis kaa fasaanaa hai

jo ashk hai aankhon men tasbiih kaa daanaa hai

ham ishq ke maaron kaa itanaa hii fasanaa hai

rone ko nahiin koii hansane ko zamaanaa hai

vo aur vafaa-dushman maanenge na maanaa hai

sab dil kii sharaarat hai aankhon kaa bahaanaa hai

kyaa husn ne samajhaa hai kyaa ishq ne jaanaa hai

ham Khaak-nashiinon kii thokar men zamaanaa hai

vo husn-o-jamaal un kaa ye ishq-o-shabaab apanaa

jiine kii tamannaa hai maranaa kaa zamaanaa hai

yaa vo the Khafaa ham se yaa ham the Khafaa un se

kal un kaa zamaanaa thaa aaj apanaa zamaanaa hai

ashkon ke tabassum men aahon ke tarannum men

maasuum mohabbat kaa maasuum fasaanaa hai

aankhon men namii sii hai chup-chup se vo baithe hain

nazuk sii nigaahon men naazuk saa fasaanaa hai

hai ishq-e-junuun-peshaa haan ishq-e-junuun-peshaa

aaj ek sitamagar ko hans hans ke rulaanaa hai

ye ishq nahiin aasaan itanaa to samajh liije

ek aag kaa dariyaa hai aur duub ke jaanaa hai

aansuu to bahot se hain aankhon men 'Jigar' lekin

bindh jaaye so motii hai rah jaaye so daanaa hai