hisaar-e-maqtal-e-jaan men lahuu lahuu main thaa - Alam Tab Tashna
hisaar-e-maqtal-e-jaan men lahuu lahuu main thaa
rasan rasan merii vahashat guluu guluu main thaa
jo rah gayaa nigah-e-sozan-e-mashiyat se
qabaa-e-ziist kaa vo chaak-e-berafuu main thaa
zamaanaa hansataa rahaa merii khud-kalaamii par
tere khayaal men masaruuf-e-guftaguu main thaa
tuu apanii zaat ke har pech-o-kham se puuchh ke dekh
dar-ba-dar merii dastak thii kuu-ba-kuu main thaa
mere raqiibon men kab thii ye hausalaamandii
navard-e-ishq men khud apane ruu-ba-ruu main thaa
ma'aal-e-umr-e-muhabbat hai bas yahii "tashna"
merii talaash thaa vo usakii justajuu main thaa
0 comments:
Post a Comment