hazaar gardish-e-shaam-o-sahar se guzaren hain - Sufi Ghulam Mustafa Tabassum

hazaar gardish-e-shaam-o-sahar se guzaren hain

vo qaafile jo terii rahguzar se guzaren hain

abhii havas ko mayyassar nahiin dilon kaa gudaaz

abhii ye log muqaam-e-nazar se guzaren hain

har ek naqsh pe thaa tere naqsh-e-paa kaa gumaan

qadam qadam pe terii rahguzar se guzaren hain

na jaane kaun sii manzil pe jaa ke ruk jaayen

nazar ke qaafile diivar-o-dar se guzaren hain

kuchh aur phail gaiin dard kii kaThin raahen

gam-e-firaaq ke maare jidhar se guzaren hain

jahaan suruur mayyassar thaa jaam-o-mai ke bagair

vo maikade bhii hamaarii nazar se guzaren hain