haq vafaa kaa jo ham jataane lage - Altaf Husain Hali

haq vafaa kaa jo ham jataane lage

aap kuchh kahake muskuraane lage

ham ko jiinaa padegaa furqat men

vo agar himmat aazamaane lage

dar hai merii zubaan na khul jaaye

ab vo baaten bahut banaane lage

jaan bachatii nazar nahiin aatii

gair ulfat bahut jataane lage

tum ko karanaa padegaa uzr-e-jafaa

ham agar dard-e-dil sunaane lage

bahut mushkil hai shevaa-e-tasliim

ham bhii aakhir ko jii churaane lage

vaqt-e-rukhsat thaa sakht "hali" par

ham bhii baithe the jab vo jaane lage