hai aabidon ko ta'at-o-tajariid kii Khushii - Nazeer Akbarabadi

iid ul fitr

hai aabidon ko ta'at-o-tajariid kii Khushii

aur zaahidon ko zuhad kii tamahiid kii Khushii

rind aashiqon ko hai kaii ummiid kii Khushii

kuchh dil-baron ke val kii kuchh diid kii Khushii

aisii na shab-e-baraat na baqriid kii Khushii

jaisii har ek dil men hai is iid kii Khushii

pichhale pahar se uth ke nahaane kii dhuum hai

shiir-o-shakar sivayyaan pakaane kii dhuum hai

piir-o-javaan ko nema'ten khaane kii dhuum hai

ladako ko iid-gaah ke jaane kii dhuum hai

aisii na shab-e-baraat na baqriid kii Khushii

jaisii har ek dil men hai is iid kii Khushii

koii to mast phirataa hai jaam-e-sharab se

koii pukarataa hai ke chhuute azaab se

kallaa kisii kaa phuulaa hai ladduu kii chaab se

chatakaaren jii men bharate hain naan-o-kabaab se

aisii na shab-e-baraat na baqriid kii Khushii

jaisii har ek dil men hai is iid kii Khushii

kyaa hi muaanqe kii machii hai ulat palat

milate hain daud daud ke baaham jhapat jhapat

phirate hain dil-baron ke bhii galiyon men gat ke gat

aashiq maze udaate hain har dam lipat lipat

aisii na shab-e-baraat na baqriid kii Khushii

jaisii har ek dil men hai is iid kii Khushii

kaajal hinaa gazab masii-o-paan kii dhadii

pishavaazen surKh sausanii laahii kii phul-jhadii

kurtii kabhii dikhaa kabhii angiyaa kasii kadii

kah "iid iid" luuten hain dil ko ghadii ghadii

aisii na shab-e-baraat na baqriid kii Khushii

jaisii har ek dil men hai is iid kii Khushii

roze kii Khushkiyon se jo hain zard zard gaal

Khush ho gaye vo dekhate hii iid kaa hilaal

poshaaken tan men zard, sunaharii safed laal

dil kyaa ke hans rahaa hai padaa tan ka baal baal

aisii na shab-e-baraat na baqriid kii Khushii

jaisii har ek dil men hai is iid kii Khushii

jo jo ke un ke husn kii rakhate hain dil se chaah

jaate hain un ke saath taa baa-iid-gaah

topon ke shor aur dogaanon kii rasm-o-raah

mayaane, khilone, sair, maze, aish, vaah-vaah

aisii na shab-e-baraat na baqriid kii Khushii

jaisii har ek dil men hai is iid kii Khushii

aisii na shab-e-baraat na baqriid kii Khushii

jaisii har ek dil men hai is iid kii Khushii

rozon kii saKhtiyon men na hote agar amiir

to aisii iid kii na Khushii hotii dil-paziir

sab shaad hain gadaa se lagaa shaah taa vaziir

dekhaa jo ham ne Khuub to sach hai miyaan "nazeer"