garmii-e-shauq-e-nazzaaraa kaa asar to dekho - faiz ahmed faiz

garmii-e-shauq-e-nazzaaraa kaa asar to dekho

gul khile jaate hain vo saayaa-e-dar to dekho

aise naadaan to na the jaan se guzaranevaale

naasiho, rahabar-o-raahaguzar to dekho

vo to vo hain tumhen ho jaayegii ulfat mujhase

ek nazar tum meraa mahabuub-e-nazar to dekho

vo jo ab chaak garebaan bhii nahiin karate hain

dekhanevaalo kabhii un kaa jigar to dekho

daaman-e-dard ko gulazaar banaa rakhaa hai

aao ek din dil-e-puraKhuun kaa hunar to dekho

subah kii tarah jhamakataa hai shab-e-gam kaa ufaq

"Faiz" taabindagii-e-diidaa-e-tar to dekho