ek se silsile hain sab hijr kii rut bataa gaii - Pirzada Qasim

ek se silsile hain sab hijr kii rut bataa gaii

phir vahii subah aayegii phir vahii shaam aa gaii

mere lahuu men jal uthe utane hii taazaa dam chiraag

vaqt kii saazishii havaa jitane diye bujhaa gaii

main bhii ba-paas-e-dostaan apane Khilaaf ho gayaa

ab yahii rasm-e-dostii mujhako bhii raas aa gaii

tund havaa ke jashn men log gaye to the magar

tan se koii qabaa chhinii sar se koii ridaa gaii

dil-zadagaan ke qaafile duur nikal chuke tamaam

un kii talaash men nigaah ab jo gaii to kyaa gaii

aaKhir-e-shab kii daastaan aur karen bhii kyaa bayaan

ek hii aah-e-sard thii saare diye bujhaa gaii