ek juu-e-dard dil se jigar tak ravaan hai aaj - Ali Sardar Jafri

ek juu-e-dard dil se jigar tak ravaan hai aaj

pighalaa huaa ragon men ik aatish-fishaan hai aaj

lab sii diye hain taa na shikaayat kare koii

lekin har ek zakhm ke muunh men zabaan hai aaj

taariikiyon ne gher liyaa hai hayaat ko

lekin kisii kaa ruu-e-hasiin darmiyaan hai aaj

jiine kaa vaqt hai yahii marane kaa vaqt hai

dil apanii zindagii se bahut shaadamaan hai aaj

ho jaataa huun shahiid har ahal-e-vafaa ke saath

har daastaan-e-shauq merii daastaan hai aaj

aaye hain kis nishaat se ham qatl-gaah men

zakhmon se dil hai chuur nazar gul-fishaan hai aaj

zindaaniyon ne tod diyaa zulm kaa guruur

vo dab-dabaa vo raub-e-hukuumat kahaan hai aaj