dil kii diivaar-o-dar pe kyaa dekhaa - Sudarshan Faakir

dil kii diivaar-o-dar pe kyaa dekhaa

bas teraa naam hii likhaa dekhaa

terii aankhon men hamane kyaa dekhaa

kabhii qaatil kabhii Khudaa dekhaa

apanii suurat lagii pyaarii sii

jab kabhii hamane aaiinaa dekhaa

haaye andaaz tere rukane kaa

vaqt ko bhii rukaa rukaa dekhaa

tere jaane men aur aane men

hamane sadiyon kaa faasalaa dekhaa

phir na aayaa Khayaal jannat kaa

jab tere ghar kaa raastaa dekhaa