teraa hii bahr safiinaa ravaan bhii teraa hai - Mazhar Imam

teraa hii bahr safiinaa ravaan bhii teraa hai

bhanvar bhii tere hain aur baadbaan bhii teraa hai

hai terii bazm men aakhir kahaan jagah merii

charaag bhii hain tere aur dhuaan bhii teraa hai

mujhe to nazr bhii karane ko kuchh nahiin apanaa

jabiin kii khaak terii aastaan bhii teraa hai

naquush-e-paa ko uthaaye kahaan khaan jaauun

ki gard-e-rah bhii terii kaaravaan bhii teraa hai

diyaa hai kyon mujhe lauh-o-qalam kaa baar-e-giraan

ki gardishen bhii terii aasmaan bhii teraa hai

bas ek kashaakash-e-benaam aur main bebas

natiijaa bhii hai teraa imtahaan bhii teraa hai

main thak ke baith rahuun yaa qadam badhaaye chaluun

fanaa bhii terii hai naam-o-nishaan bhii teraa hai