dekhaa hai zindagii ko kuchh itanaa qariib se - Sahir Ludhianvi
dekhaa hai zindagii ko kuchh itanaa qariib se
chehare tamaam lagane lage hain ajiib se
is rengatii hayaat kaa kab tak uthaayen baar
biimaar ab ulajhane lage hain tabiib se
har gaam par hai majamaa-e-ushshaaq muntazir
maqtal kii raah milatii hai kuu-e-habiib se
is tarah zindagii ne diyaa hai hamaaraa saath
jaise koii nibaah rahaa ho raqiib se
ai ruuh-e-asar jaag kahaan so rahii hai tuu
aavaaz de rahe hain payambar saliib se
0 comments:
Post a Comment