dar ke kisii se chhup jaataa hai jaise saaNp Khazaane men - munir niazi

dar ke kisii se chhup jaataa hai jaise saaNp Khazaane men

zar ke zor se zindaa hain sab Khaak ke is viiraane men

jaise rasm adaa karate hon shaharon kii aabaadii men

subah ko ghar se duur nikal kar shaam ko vaapis aane men

niile rang men duubii aaNkhen khulii padii thiin sabze par

aks padaa thaa aasmaan kaa shaayad is paimaane men

dil kuchh aur bhii sard huaa hai shaam-e-shahar kii raunaq men

kitanii ziyaa be-suud gaii hai shiishe ke lafz jalaane men

main to 'munir' aaiine men Khud ko tak kar hairaan huaa

ye cheharaa kuchh aur tarah thaa pahale kisii zamaane men